Vor einischer Zeit hatte mer beim Baucamp mol die verrickt Idee bissl was uff pälzisch im Blog zu schreiwe. De Fabian hot des dann ach diregt gemacht unn glei dezu geschriwwe dass wenns wem gefalle duud, der sich grad bei mir melle solld.
War jo klar, dass irschend so en Dummbeidel mir glei druff schreibt ich solld ach mol so schreiwe. Also, was will mer mache…

Weihnachte mocht ich schun immer echt gern. De Schnee, die Still, alles is e bissl langsomer als sunscht. Awwer in Costa Rica is des alles e bissl anerscht.
Wenn mer hier an Weihnachte denkt, denkt kenner an Schnee oder kaltes Wedder oder an Tanneduft unn Plätzscher. Do blinkt immer alles, ’s is warm (immerhie räänts allewei net so viel) unn ständisch hert mer aus irschendner Eck laudi Weihnachtsmusik uff spanisch die ach genauso in em Club laafe kennt.

Do fallts mer leider echt schwer in so e Weinachtsstimmung zu kumme. Irschendwie fiehlt sich des alles äfach net oh wie dehääm.
Des Johr werr ich iwwer die Johre no Panama fahre unn dort bissl Zeid uff e paar Inselscher verbringe. Bestimmt gebts dann ach mo widder e paar Bilder vun mir ausm Urlaub.

Aller dann, winsch eich e schäni Weihnacht unn e gute Rutsch
Daniel